قبل أبدأ ، الشرح في هالصفحة مبسط مره وخالي من أي تعقيدات لأجل تعم الفائدة ..

هالصفحة راح تشرح ماهو لينكس باسلوب مبسط وسهل ، وراح يفهمه أي شخص حتى المتخصص بالكمبيوتر ..

بمدونتي هذي ، مدونة الرووت جريس ، ملاحظ إنت إني كل شوي متكلم عن طريقة ، عن برنامج ، عن فكرة نقدر نسويها و نطبقها في لينكس ..

طيب إنت بالتأكيد تسأل نفسك ، وش لينكس هذا ؟

ليه جريس مخصص مدونته ليتكلم عن لينكس هذا ؟

أبغى أعرف وش الزين في لينكس عشان جريس يخصص له مدونة خاصة فيه ، أبغى أعرف وش لينكس ..

لينكس بكل بساطة هو مشروع برمجي مفتوح المصدر يندرج تحت مظلة مشاريع المصادر المفتوحة

إستنى ، وش قصدك بـ ” مفتوح المصدر يندرج تحت مظلة مشاريع المصادر المفتوحة ” ؟

مفتوح المصدر أو المصادر المفتوحة هو مصطلح يطلق على أي برنامج لك إنت يالمستخدم كامل الحرية بالتصرف فيه على كيف كيفك ..

أوكي ، طيب هذي وش معناها  ” مصطلح يطلق على أي برنامج لك إنت يالمستخدم كامل الحرية بالتصرف فيه” ؟

المصادر المفتوحة هدفها خيري ونفعي أكثر من إنو يكون هدفها ربحي ، وش قصدي ؟

لما انا ياجريس أسوي لي برنامج رهييب يحسب لي المعادلات الرياضية الصعبة بأسهل طريقة ، يعني بهالبرنامج انا أغنيت وريحت مستخدمه من إنه يجيب له مجموعه أوراق ويجلس يحاول يحل فيها هالمعادلات ..

لما أصمم هالبرنامج انا يا جريس وأخلص منه ويكون جاهز للنشر ، عندي خيارين

الخيار الأول :

إنو هالبرنامج أروح أسجله باسمي بوزارة التجارة عشان ما أحد يقلده ، ثم أروح أبيعه على خلق الله ، وياويله يا سواد ليله اللي يأخذ هالبرنامج بطريقة غير شرعية ، يعني ما يشتريه مني أو يأخذه منسوخ ، لازم إذا صرت تبغى هالبرنامج تقوم تروح تشتريه مني ..

وهذا طبعاً من حقك إنت يالمبرمج ، وتبي تشوف وتلمس نتيجة تعبك ..

الخيار الثاني :

إني أخلي هالبرنامج مفتوح المصدر ، يعني أخليه تحت مظله المصادر المفتوحة ، يعني انا سويت خير وخليت الناس تستفيد من برنامجي بشكل مجاني و كامل ، ولهم مطلق الحرية بالتصرف فيه ، يبيون يبيعونه ؟

يأخذونه ويبيعونه ، لهم كامل الحرية

يبغون يعدلون على تصميمي وكتابتي للبرنامج ؟

هم أحرار ، لهم مطلق الحرية ..

هذا هو هدف المصادر المفتوحة ، هدفها إنها تساعد الناس بشكل مجاني بدون أي تكاليف ..

هذا شرح بسيط ومبسط مره لمظلة المصادر المفتوحة اللي لينكس يندرج تحتها ..

حلوين ، أعتقد شرحي واضح للحين، وإذا كان مو واضح ومو مبسط ياليت ترسلون لي ملاحظاتكم على

root@jerais.com

حلو ، خلصنا من شرح المظلة اللي لينكس يندرج تحتها ، اللي هي مظلة المصادر المفتوحة ..

الحين نشرح وش لينكس ..

لينكس زي ما ذكرت فوق ،  هو مشروع برمجي مفتوح المصدر ، هالمشروع قاموا شباب وزادو عليه واضافوا برامج وحسنوه الين ما صار نظام تشغيل كامل ..

تقدر عن طريقة تتصفح النت فيه ، تقرأ إيميلك ، تشارك بالمنتديات ، تسولف بالماسنجر ، تشغل الفيديو ، تسوي عروض بوربوينت ، تنشئ ملفات وورد وأكسل ، تصمم تواقيع وكروت ، تصمم مواقع ، تطبع ملفاتك عن طريقه ،  يعني تسوي عن طريقة كل شيء ..

وبس ، هذا هو لينكس :)

طيب ، وش الجديد ؟

وش اللي يفرقه عن نظام التشغيل ويندوز اللي نستخدمه كل يوم ؟

سؤالك حلو ، وجوابي بيكون أحلى :)

تابع معي هالأمثلة وبتعرفه ليه لينكس يفرق عن ويندوز إن شاء الله

- في ويندوز ، إذا بغيت تثبت برنامج ، خلنا نقول الفوتوشوب ، لازم إنك تسوي هالطريقة اللي تحت :

أول شيء ، تبحث عن الفوتوشوب في النت

ثاني شيء : تحمل الفوتوشوب من النت

ثالث شيء : لما يخلص الفوتوشوب تحميل  من النت ، يجي دور التثبيت ، وطبعاً كل الناس تعرف إنو في ويندوز إذا بغيت تثبت برنامج ، بتجلس تظغط كلمة ” التالي Next ” يمكن أكثر من ٥ مرات .

رابع شيء : لما تخلص تثبيت لبرنامج الفوتوشوب ، بتطلع لك شاشة تقولك لازم إنك تعيد تشغيل الجهاز .

خامس شيء : بعد ماتعيد تشغيل الجهاز ، تروح تشغل الفوتوشوب ، وقبل ما تستمع بالبرنامج ، بتطلع لك شاشة بتقولك أكتب الرقم التسلسلي للبرنامج ، ولا أبقفله عليك مانت مستخدمه .

سادس شيء : الرقم التسلسلي من وين بتجيبه ؟

يا إنك بتروح تشتري هالبرنامج بكم ميه دولار ، عشان يعطونك رقم تسلسلي خاص فيك عشان تشغل فيه البرنامج

أو إنك بتروح بتدور لك على طريقة عشان تدبر لك رقم تسلسلي تشغل فيه برنامجك ، وهالطريقة طبعاً إنك تدور كاسر للرقم التسلسلي أو ما يسمى ” كراك Crack ” ،، وإذا لقيت الكراك إنت وحظك إذا ما كان مدموج فيه ملف تجسس :)

وهـ خلاص إنتهينا ، الحين قدرنا نثبت الفوتوشوب في ويندوز !

في لينكس ، إذا بغيت تثبت برنامج ، لنفترض برنامج مشغل ملفات MP3 ، بنسوي هالخطوات :

- نفتح إضافة \ إزالة البرامج الموجودة في لينكس

- في خانة بحث ، نكتب إسم البرنامج أو وصفه أو شغلته ، ثم نظغط كلمة بحث

- بيطلع لنا مجموعة برامج تطابق بحثك ، نختار لنا اللي يجوز لنا وصفه وشغلته ، ثم نظغط كلمة تثبيت

- نخلي البرنامج يثبت نفسه بنفسه ، وعلى ما يخلص تثبيت نفسه بنفسه ، حنا نجلس ندور بهالمواقع لين يخلص تثبت

- لما يخلص تثبت ، إترك عنك الدوران في المواقع ، وروح إستخدم برنامجك :)

خلاص ، خلصنا :)

تعرفون ، يمكني زدت خطوة الدوران في المواقع ، لأنو خطوت التثبيت أقل من كذا :)

خلصنا المثال الأول ، خلنا نأخذ المثال الثاني ..

جريس ياخي انا أسمع بلينكس ، ولما بحثت عنه لقيت كل شيء أكتب الأمر الفلاني وأكتب الأمر الفلاني ، حتى إنت في مدونتك مسوي نفس الشيء ، رح أكتب هالأمر ومن هالأمور ، يعني شوي صعب على اللي توه مبتدأ ، صح هالكلام ؟

شوف حبيبي ، في لينكس ، تقدر تتحكم فيه وتستخدمه إستخدام كامل عن طريق الأوامر أو عن طريق الشاشات ، يعني زي نظام ويندوز وماك آبل ، شوف مثلاً هالصور اللي تحت من جهازي ومجمعها من النت عشان أوريك أنو تقدر تستخدم لينكس بدون ما تكتب أي أمر ..

فيه من الصور اللي تحت ، بتقول وش هذي ؟

هذي هي أسطح مكتب لينكس الخيالية اللي إنت منحرم منها وعايش مع الأشهب ويندوز :) ..

اللي فوق بالصورة ، هذا سطح مكتبي في لينكس ، لا فيه لا شاشة سوداء ولا أوامر ، زيه زي ويندوز وماك آبل ، شوفوا الصورة الثانية وعلموني وين الشاشات السوداء :) ..

شفتوا سطح المكتب كيف ، أكمل ؟ :)

شفتو الدلع كيف !

أظن يكفي ، بصراحة ، قد شفت سطح مكتب كذا قبل  في ويندوز ؟!

شيء ثالث ياجريس ، ياخي أيش اللي يجبرني أنتقل من ويندوز إلى لينكس ؟

سؤالك حلو ومنطقي ، وش اللي يجبرك تنتقل إلى لينكس وتخلي ويندوز ؟

كل شيء يجبرك :)

عد معي ،

- في ويندوز ، بين فترة وفترة جايك فايروس أو ملف تجسس ، في لينكس مافيه، أيه مافيييييييييه فايروسات مثل ويندوز ، لو جايتك إنفلونزا وكحيت قدام شاشة ويندوز جهازك تلاقيه جاه فايروس الإنفلونزا ..

يمكن فوق ٩٠ جهاز لينكس مرو علي أو أكثر ، ولا واحد ثبتنا فيه مضاد فايروسات ، وتدرون من القوة أيش نسوي ؟

نجيب الجهاز حق ويندوز اللي فيه فايروس ، ونشغل عليه لينكس بدون ما نلمس شعره من ويندوز  أو من ملفات ويندوز أو من ملفات صاحب الجهاز ، عشان ندخل على الجهاز عن طريق لينكس ونحذف الفايروس الموجود في ويندوز واللي جاب الفايروس هذا .

- في ويندوز ، أتحداك إذا ما تعودت تسوي له إعادة تشغيل كل شويتين ، في لينكس مافيه الأشياء هذي ، في لينكس يجلس ١٠ سنوات بدون إعادة تشغيل لثبات النظام وقوته .

والكلام هذا حقيقة ياجماعة ، تراني ما أخترعته ، لدرجة إنو الحين فيه منافسة مين أكثر واحد تارك جهازه اللينكس شغال بدون إعادة تشغيل !

شوف الرابط هذا للتأكد ..

- في ويندوز ، كم مره علق وهنق عليك النظام ؟

كم مره وإنت بأمان الله تشتغل ما تلاقي إلا جهازك معلق ويقولك حدث خطأ الرجاء الكتابة لمايكروسوفت ؟

في لينكس مافيه الدلاخة والغباء ( المعذرة على الكلمتين ) هذي!

- في ويندوز ، كم واحد تعرض للإختراق وإنسرقت منه ملفات حساسة ولا وده تطلع أو تنسرق ، أو إنسرق منه كلمة السر حقته ؟

في لينكس ، مافيه هالأشياء ، ولا عمرها مرت علي ..

أكمل ؟

- كم مرة طلع لك في ويندوز رسالة تقولك التأكد إن ويندوز أصلي وشيء مقارب لهالكلام ، عشان تسجله بموقع مايكروسوفت ويتأكدون إنو النسخة اللي معك أصلية مو منسوخة ولا مكسورة ؟

ما أخبرها طلعت في لينكس أبد ..

نجي لويندوز فيستا الجديد ، تعرف أنو ويندوز فيستا إذا صرت تبيه يشتغل بكل كفاءته لازم إنك تجيب له ذاكرة أو ما يسمى رام لاتقل عن ٢ قيقا و مساحة فارغة بالهارديسك ماتقل عن ٥٠ قيقا ومعالج ما أدري أيش وكرت شاشة خاص ومدري أيش بعد !

في لينكس ، لاتجيب أي جهاز ،  تشوف الجهاز القديم اللي إنت راميه ؟ شيل الغبار عنه ، وخلنا نثبت فيه لينكس ، وبيشتغل بكل كفائته :) ..

يعني بالعربي ، إذا كان جهازك قديم ، إنسى إنك تستخدم ويندوز فيستا ، وبتقولي أصلاً انا ما استخدم فيستا واستخدم ويندوز أكس بي يعني ما احتاج أغير الجهاز ،،

أبقولك حبيبي ، مايكروسوفت بتوقف دعم ويندوز أكس بي منتصف ٢٠٠٩ ، تدري أيش معناته هالكلام ؟

هالكلام معناته إذا نزلت ثغرة في ويندوز أكس بي حقك ، كل اللي بتقدر تسويه إنك بتفصل سلك الإنترنت من الكمبيوتر حقك عشان ما أحد يقدر يدخل عليك ، لأنه بيطلع مفتوح لكل من هب ودب :) .

هل تفهم من كلامي إنو لينكس نظام خرافي ولا مثله أحد أبد أبد ولا تواجهك مشاكل فيه ؟

ما راح أكذب عليك وأبهر كلامي والمع ، مافيه شيء كامل ، الكمال لله سبحانه وتعالى ..

لينكس فيه مشاكل زيه زي ماك آبل وويندوز ، لكنها أقل مو بالدرزن زي الأخ ويندوز :) ..

والله أتعب أتعب وانا أعدد مميزات لينكس على ويندوز ، وكل واحد مننا عنده مشاكله مع ويندوز وصعب أحصرها ، وترى مالي أسهم في لينكس ، بس أتمنى الخير لغيري ، أبيهم يحمون نفسهم ، و يعني بالمنطق لما الناس تشوفها تتكلم عن شيء معين وللحين إنت ما أقتنعت ، على الأقل جربه وبتعرف مميزاته الباقية ..

إترك عنك كلامنا ، يمكن ما يقنعك في أي نقطة ، العاقل خصيمه عقله ، أعط لينكس تجربة شهر ، وشوف وش يصير عليك ..

شيء ثاني ، فيه واحد بيقول :

لو كان لينكس قوي ورهيب ، ليه ويندوز منتشر بكل مكان ولينكس بس نسمع به ولا نشوفه ، كأنه بيض صعو ؟

:)

سبب بسيط ، إنت دخلت المدرسة وكان ويندوز موجود ، وطلعت على الدنيا وكان ويندوز موجود ، وتعودت عليه وتعودنا عليه ..

بس هذا كل السبب ، لينكس طالع عام 1991 وبدء يذيع صيته بكل قوة قبل ٤ سنوات تقريباً ، هذي هي الفكرة، وهذا اللي خلاه يشتهر ..

قبل ما أنهي كلامي ، لينكس له إصدارات و نُسخ ،

يعني ، إذا ودك تسأل عن شيء في لينكس ، بيسألونك الناس أيش نسختك أو توزيعتك حقت لينكس  ؟

أمم بما إنك توك مبتدئ ، أفضل نسخة أو توزيعة تناسبك هي نسخة وتوزيعة لينكس أوبونتو ..

وبس خلصنا ..

نصيحة أخ ما يعرفك ولا تعرفه ، الساعة الحين ٣.٣٠ الفجر ، وبكرة عندي دوام من صبحية الله ، ليه أتعب نفسي وأنشئ مدونة عشان أنشر وأكتب عن لينكس ؟

عشانك ، أبيك تدري إنو الكمبيوتر مو بس كله مضاد فايروسات ، وإختراقات ، وقلق ، أبيك تستمع وإنت تتصفح النت إنو ما فيه أحد بيسرق كلمة المرور حقتك ، أبيك تنسى شيء إسمه علق ، فورمات ، فايروس ، ملف تجسس ، شاشة زرقاء ، ثقيل ، أعادة تشغيل ..

أبيك تستمع بالكمبيوتر ، وتخلي الأشياء اللي تعور راسك ،خلها لغيرك يهتم بها ، لينكس يهتم بها !