مساء النور.

نتطرق في تويتر عن كيفية التحكم بالمواقع عن طريق SSH، أيش الأمر الفلاني الخاص بنقل قاعدة البيانات وأيش الأمر العلاني الخاص بنقل ملف معين، وحبيت أدمج كل هالكلام والأوامر في صفحة واحدة – اللي هي هذي – لأجل تصير مرجع للشخص المهتم.

قبل ابدأ، الموضوع هذا- زي ما هو موضح في العنوان – راح يشرح الأساسيات الخاصة بإدارة المواقع بالـ SSH، وراح يكون بشكل مره مبسط وسهل، وكلنا يالأدمنية نعرف إن إدارة المواقع عن طريق SSH برضوا لها طرق ثانية، عشان كذا كتبت في العنوان ” أساسيات ” :-)..

عموماً، الموضوع راح يكون مقسم لعدة أجزاء:

1- مقدمة بسيطة للـSSH، مع توضيح فوائد إدارة المواقع عن طريقها.

2- التطبيق:

2.1: فكرة تطبيق الشرح.

2.2: متطلبات التطبيق والشرح العملي لمستخدمي أنظمة ويندوز.

2.3: متطلبات التطبيق والشرح العملي لمستخدمي أنظمة لينكس ويونكس.

2.4: متطلبات التطبيق والشرح العملي لمستخدمي أنظمة لينكس ويونكس.

3: التطبيق والشرح العملي:

3.1: ضغط ملفات الموقع وتجهيزها للنقل.

3.2: إستخراج قاعدة البيانات وتجهيزها للنقل.

3.3: نقل قاعدة البيانات والملفات إلى السيرفر الثاني.

3.4: إستعادة ملفات الموقع ووضعها في السيرفر الثاني.

3.5: إستعادة قاعدة البيانات وزرعها في السيرفر الثاني.

4: ملاحظات مهمة.

1- مقدمة بسيطة للـSSH، مع توضيح فوائد إدارة المواقع عن طريقها:

الـSSH هي إختصار لعبارة Secuer Shell، ولو ترجمناها بالعربي بيطلع ” الصدفة الأمنة “، وفكرة هالإسم إن محتويات هالصدفة أو هالشل بيكون محمي وأمن، ولا أحد بيقدر يفك محتوياتها.

إنت الحين لما تشبك على سيرفر عن طريق SSH، الإتصال اللي بينك وبين هالسيرفر تمت حمياته بواسطة هالشل عشان ما يجي أحد ويحاول يلقط المعلومات اللي جالس تنقلها من \ إلى السيرفر.

وتقدر ترجع لموضوع: ” لتفادي إختراق موقعك، توقف عن إستخدام FTP ” عشان تعرف كيفية إلتقاط البيانات الخاصة بالسيرفر تبعك – بكل سهولة – لما تتصل فيه.

وعشان ترسخ في بالك فكرة SSH، لما تتصل في السيرفر الخاص فيك عن طريقها، أعتبرها هالـSSH قامت بإنشاء وتركيب “أنبوب” – ماصورة :-P – بينك وبين السيرفر الخاص فيك، والأنبوب هذاومحتوياته مرره مشفره ومأمنه ولا أحد يقدر يكسرها.

توضيح: ترا هالأنبوب مو من رأسي، هذا أسم علمي لـ Tunnel الخاصة بالـ SSH :-).

وضحنا فكرة الـSSH، طيب وش أيش الفوائد؟

1- عن طريقها، تقدر تتحكم بالموقع والسيرفر الخاص فيك بشكل كامل، سوا كان هدفك نقل ملفات أو تعديل خصائص وإعدادت، بشكل آمن.

2- عن طريقها، تقدر تتحكم بكيفية شكل موقعك ومحتوياته، يعني ترفع ملف، تحذف ملف و تنقل ملف.

3- عن طريقها، تقدر تنقل محتويات موقع كامل – قاعدة بيانات وملفات – إلى سيرفر ثاني بدون تدخل منك، يعني بشكل تلقائي.

4- عن طريقها، تسرع عملك لإداة موقعك، وراح تشوف الحين وش قصدي لما نبدأ بالتطبيق.

هذي بعض المميزات، ولما تتعمق بإدارة السيرفرات، راح تعرف أكثر وأكثر.

نبدأ الحين التطبيق.

2- التطبيق:

2.1: فكرة تطبيق الشرح:

فكرتنا أيش بتكون؟

راح يكون عندنا عدد أثنين- 2 – سيرفر – سيرفرين – ، السيرفر الأول عنوانه:

server01.jerais.com

والثاني عنوانه:

server02.jerais.com

حلو، السيرفر الأول server01.jerais.com، يحتوي على موقعي، اللي فيه هالمدونة، وأبنقل جميع محتوياته من ملفات وقواعد بيانات من نوع MySQL إلى السيرفر الثاني، اللي هو server02.jerais.com، وراح أشرح لكم حبه-حبه، خطوة-خطوة لكيف تنقل كل العفش – الملفات وقواعد البيانات- من السيرفر الأول إلى الثاني وكلها عن طريق SSH.

2.2: متطلبات التطبيق والشرح العملي لمستخدمي أنظمة ويندوز:

لمستخدمي هالغثيث ويندوز، إستخدموا برنامج PuTTY، طبعاً أوبن سورس – برنامج حر مجاني مفتوح المصدر تقدر تستخدمه بدون كراك أو تسجيل – وهذي صورته:

زي ما إنتم شايفين، واجهة البرنامج أسهل من السهلة، في حقل Host name ( or IP Address )، تكتب أسم أو الأي بي الخاص بالدومين تبعك، وفي حقل Port، تكتب بورت SSH، وهو إفتراضياً 22.

وبعدها تضغط على زر Open في أسفل البرنامج، وراح يشبك لك على السيرفر الخاص فيك، وبيطلب من اليوزر نيم الخاص بسيرفرك وبعدها الباسوورد.

ملاحظة: يمكن يطلع لك رسالة تنبيهيه قبل ما تتصل بالسيرفر، وتحتوي زي ما اتذكر على كتابة فيها public key finger print وشي زي كذا، إنت إضغط Yes عشان تقبل public key الخاص بالسيرفر في جهازك.

2.4: متطلبات التطبيق والشرح العملي لمستخدمي أنظمة لينكس ويونكس.

في لينكس ويونكس، ما تبغى أي متطلب، فقط تشغل التيرمينال وتنفذ أمر الإتصال زي ما انا موضح تحت:

ssh user01@server01.jerais.com

حيث:

ssh: هو أمر الإتصال بسيرفر معين عن طريق برتوكول SSH.

user01: هو إسم المستخدم الموجود على السيرفر.

server01.jerais.com: هو اسم السيرفر اللي تبغى تشبك عليه.

لما يشبك معاك، بيطلب منك الباسوورد الخاصة باليوزر user01.

حلو، خلصنا من المتطلبات، الحين let’s get down to business :-)..

3: التطبيق والشرح العملي:

3.1: ضغط ملفات الموقع وتجهيزها للنقل:

أوكي، الحين خلونا نشبك على السيرفر الأول، اللي هو server01.jerais.com، انا أشتغل من نظام لينكس، يعني الخطوة هذي – فقط – إذا كنت تستخدم ويندوز، إنت تسويها بإنك تتصل بالسيرفر عن طريق PuTTY:

ssh user01@server01.jerais.com

راح يطلب مني الباسوورد الخاصة باليوزر user01، أبكتبها ثم خلاص وقتها خلاص أكون دخلت على السيرفر عن طريق الشل SSH، والحين أببدأ شغلي بنقل الملفات.

أول أمر راح أنفذه، هو pwd، وهو إختصار print working directory، والمقصد فيه ” أعرض لي المسار اللي انا فيه “

pwd

وعرض لي

/home/user01

حلو، الحين انا بالمجلد الخاص باليوز حقي user01، خلونا نستعرض محتويات هالمجلد عن طريق الأمر ls، وهو إختصار list:

ls

وعرض لي

public_html

عرض لي مجلد أسمه public_html، وهالمجلد هو اللي يحتوي على محتوات موقعك كلها، أي ملف وأي حاجه تكون موجود في هالمجلد، على طول راح تنعرض على الويب.

خلونا ندخل هالمجلد ونشوف أيش بداخله، عشان نجهز ضغط الملفات وإرسالها إلى السيرفر الثاني server02.jerais.com.

بنستخدم الأمر cd لدخول مجلد public_html، والأمر cd هو إختصار لجملة change directory:

cd public_html

نعرض وين حنا في الحين عن طريق pwd

pwd

وعرض لي

/home/user01/public_html

نستعرض محتوياته:

ls

وعرض لي

wp
عرض لي مجلد واحد، اللي هو مجلد المدونة.

حلو، الحين خلونا نضغط هالمجلد بكل محتوياته عشان نرسله للسيرفر ونفكه هناك ويكون نسخه طبق الأصل من الموجود على السيرفر الحالي.

وفكرة الضغط سهلة، بنستخدم برنامج Tar المخصص لضغط املفات وأرشفتها – تقدر تعتبره زي WinRar, WinZip -، لكن Tar أكثر كفاءه منهم، وهو يجي مدمج مع أنظمة لينكس ويونكس.

الحين راح نضغط المجلد wp بجميع محتوياته ونجهزه للنقل، وأمر الضغط كذا:

tar -czvf wp-backup.tar.gz wp

والشرح:

tar: هذا أمر الضغط.

-czfv: هذي خيارات الضغط، وتبيانها:

c: إختصار كلمة create – إنشاء -.

z: إختصار لضغط الملف بجميع محتوياته عن طريق برنامج gzip.

v: هذا الخيار مو مهم، انا اللي مضيفه ولا أقدر أستغني عنه، وهو المقصود فيه verbose, view، وهو يستخدم عشان الـ debug لعمية الضغط.

f: إختصار لعبارة file name، وهي المقصود فيها إسم الملف الناتج من الضغط، يعني الـ output.

بعدها طال عمركم جانا الخيار wp-backup.tar.gz، وهذا إسم الملف الناتج واللي بنرسله للسيرفر.

wp: هذا المجلد اللي نبغى نضغطه ونأرشفه.

نفذت الأمر انا، وشوف وش طلع لي:


wp/
wp/index.html
wp/wp-admin/
wp/wp-admin/index-extra.php
..
..
..
..
wp/wp-admin/post-new.php
wp/wp-links-opml.php
wp/wp-feed.php


حلوين، الحين إذا نفذت أمر إستعراض الملفات ls، راح تلاقي ملفنا wp-backup.tar.gz تم إنشائه، شوف:

ls

وعرض لي


wp
wp-backup.tar.gz < هذا مجلد موقعك بعد الضغط

أوكيشن، جهزنا نسخة من ملفات الموقع، والحين هي جاهزة للإرسال للسيرفر الثاني، خلونا نأخذ نسخة من قاعدة البيانات.

3.2: إستخراج قاعدة البيانات وتجهيزها للنقل:

حلوين، أخذنا نسخة من الملفات، وهي جاهزة للنقل، خلونا نأخذ صورة من قاعدة البيانات ونستخرجها إلى ملف معين والملف هذا هو اللي بننقله إلى السيرفر الثاني.

أول شيء، إطلع من المجلد public_html، عن طريق هالأمر:

cd ~

ليه نطلع؟

لأن حنا الحين راح نأخذ نسخة من قاعدة البيانات، وهالنسخة بتكون ملف نصي TXT، وقبل شوي ذكرت أي ملف موجود في public_html راح ينعرض للويب بشكل إفتراضي، يعني لو إنت إستخرجت قاعدة البيانات إلى ملف إسمه jerais-db.sql وخليتها موجوده على public_html، أي واحد يعرف إسم الإستخراج الخاص بقاعدة البيانات يقدر يطلبها عن طريق المتصفح ويحملها!

أدري يمكن أحد يقولي كيف الواحد بيعرف اسم ملف قاعدة البيانات حقت موقعي؟ كلامك صحيح 80000%، بس ياعزيزي غالباً اللي يطبقون شروحات الـ How-To تلاقيهم يستخدمون نفس الأسماء المستخدمة في هذا الشرح، يعني إذا قلت لك إستخرج قاعدة البيانات إلى الأسم

website-dbbackup.sql

مع تبديل الأسم website إلى أسم موقعك، راح يجي واحد ويطلب الملف website-dbbackup.sql مع تغير الأسم حق website إلى اسم موقعك، و أوبس!

حمل قاعدة البيانات!

واللي يستخدم برامج penetration testing زي Nessus مثلاً، راح يلاقي إنهم يطلبون ملفات مشهورة بإضافة إمتداد الباك أب المتعارف عليه، اللي هو -backup .

عموماً، ماودي أطول، إنت الحين طالع من المجلد public_html، وتعرف إذا كنت طالع أو لا عن طريق الأمر pwd، إذا ما كنت برا هالمجلد، نفذ الأمر اللي في الخطوة 3.2 فوق.

أوكي، مستعدين نأخذ نسخة من قاعدة البيانات؟

بسم الله، نفترض إن اسم قاعدة البيانات wordpress1، راح نستخرجها إلى ملف نصي مظغوط بالأسم wordpress1.sql، وهذي هي الطريقة:

mysqldump -u user01 -pxxxx1234 wordpress > wordpress1.sql

حيث:

mysqldump: برنامج أخذ النسخ من قواعد بيانات MySql.

-u user01: حرف u هو خيار إدخال اسم اليوزر الخاص بقاعدة البيانات، ويجي متبوع باسم اليوزر ،وهو خاص بقاعدة البيانات الخاصة فيني – كل واحد له يوزر خاص بقاعدة بياناته، إرجع لإعدادت موقعك -.

-pxxxx1234: الخيار p إختصار لكلمة password، وهو الباسوورد الخاصة باليورز user01 المسموح له التحكم بقاعدة البيانات الخاصة فيني – برضوا كل واحد له يوزر وباسوورد خاص فيه، إرجع للإعدادت موقعك-.

والـxxxx1234 هذي الباسوورد حقت اليوزر user01.

تنبيه: لاحظ إنو مافيه مسافة بين الخيار -p والباسوورد، لاتحط مسافة بينهم.

wordpress: اسم قاعدة البيانات اللي ابأخذ نسخة منها.

>: هذي إشارة تحويل مخرجات قاعدة البيانات wordpress1 إلى الملف wordpress1.sql.

wordpress1.sql: هذا اسم قاعدة البيانات المستخرجة واللي راح ننقلها.

وإذا كنت تبغى تضغط قاعدة البيانات في حالة إنها كبيرة وقت الإستخراج، إستخدم الأمر:

mysqldump -u user01 -pxxxx1234 wordpress | gzip -c wordpress1.sql.gz

وراح يكون الملف المظغوط wordpress1.sq.gz هو نسخة طبق الأصل مظغوطة من قاعدة بياناتك.

وعشان تشوف هل تم أخذ نسخة أحتياطية من قاعدة البيانات ولا لا، طبق هالأمر:

ls -lh wordpress1.sql*

وبيعرض لك:

-rw-r--r-- 1 user01 user01 105K 2009-03-19 20:19 wordpress1.sql

وزي ما إنت شايف فوق، عارض لي حجم قاعدة البيانات 105 كيلوبايت، معناها إنو أخذ النسخة الأحتياطية إكتمل.

أوكي، خلصنا من أخذ نسخة من قاعدة البيانات، ونسخة من ملفات الموقع، الحين خلونا ننقلها إلى السيرفر الثاني server02.jerais.com.

3.3: نقل قاعدة البيانات والملفات إلى السيرفر الثاني:

قبل ننقل الملفات للسيرفر الثاني، خلوني أسرد لكم أمتداد أو Path الملفات اللي انا ضغطتها عشان أجهزها للنقل:

ملفات ومحتويات الموقع موجودات على الإمتداد هذا:

/home/user01/public_html/wp-backup.tar.gz

ملف النسخة الإحتياطية من قاعدة البيانات موجود على الإمتداد:

/home/user01/wordpress1.sql

إنت لازم تعرف إمتداد الملفات اللي جهزتها وينها فيه، عشان تنقلها إلى السيرفر.

وبرضوا، حنا راح ننقل إلى السيرفر الثاني server02.jerais.com اللي فيه اليوزر user02.

بسم الله، راح نستخدم الأمر أو البرنامج scp، وهو إختصار لـ Secure Copy، وفكرته إنك تنقل الملفات بشكل أمن عن طريق بروتوكول SSH.

وفكرة النقل بتكون كذا:

نقل النسخة الإحتياطية من الموقع اللي اسمها wp-backup.tar.gz إلى مجلد الويب في السيرفر الثاني اللي هو public_html تحت اليوزر user02:

scp /home/user01/public_html/wp-backup.tar.gz user02@server02.jerais.com:~/public_html/

وراح يطلب منك الباسوورد حقت اليوزر user02 الموجود على السيرفر server02.jerais.com، لما تكتبها راح يبدأ النقل، ولما يخلص راح يرجعك للشل من جديد.

نقل النسخة الإحتياطية من قاعدة البيانات اللي أسمها wordpress1.sql إلى مجلد اليوزر user02 على السيرفر الثاني server02.jerais.com.

scp /home/user01/wordpress1.sql user02@server02.jerais.com:~/

وبرضوا لما يخلص النقل، راح يرجعك للشل للي إنت عليها الحين.

وبس خلصنا نقل :-)..

الحين بنشبك على السيرفر الثاني server02.jerais.com من السيرفر الحالي اللي حنا عليه شابكين الحين، وبنتحكم بالموقع الثاني من سيرفرنا الأول server01.jerais.com.

أكتب:

ssh user02@server02.jerais.com

بيطلب منك قبول الـ public key الخاص بالسيرفر، أكتب Yes ثم بيطلب منك الباسوورد الخاصة باليوزر user02 على السيرفر، إكتبها إنت ثم بتدخل على السيرفر.

3.4: إستعادة ملفات الموقع ووضعها في السيرفر الثاني.

أوكي، الحين بعد ما نقلنا الملفات وقاعدة البيانات، بنشوف هل تم النقل ولا لا.

إدخل على مجلد الويب:

cd /home/user02/public_html

ثم إستعرض محتوياته:

ls

وبيطلع لك هالملف:

wp-backup.tar.gz

حلو، يعني تم النقل بكل نجاح، الحين خلونا نفك الظعط عنه:

tar -xzvf wp-backup.tar.gz

حيث:

tar: هو أمر الضغط \ فك الضغط.

-x: من كلمة Extract، والمقصود فيها إستخراج.

z: هذي حقت الضغط، وإستخدمناها هنا لأجل نقول ” برضوا فك الضغط “.

v: من كلمة verbose أو view، يعني أعرض لي وش جالس تسوي ” debug “.

f: من file name

حلوين، الحين إنفك الضغط عن الملف، وتم إستخراج المجلد wp إلى مجلد الويب في السيرفر server02، والدليل، إستعرض محتويات المجلد

ls

وبيطلع لك

wp < هذا مجلدنا اللي فكينا الضغط عنه
wp-backup.tar.gz

3.5: إستعادة قاعدة البيانات وزرعها في السيرفر الثاني.

إستعدنا محتويات الموقع، باقي نسترجع قاعدة البيانات.

قبل ما نزرع قاعدة البيانات، لازم ننشىء لنا واحدة عشان نسترجع محتويات قاعدة البيانات القديمة إلى هالجديدة في السيرفر الجديد، وطبعاً راح ننشئها عن طريق الشل.

في الشل، أكتب

mysql -u user02 -pXXXX

حيث:

mysql: هو أمر الدخول على قاعدة البيانات.

-u: أمر إدخال أسم اليوزر، اللي هو user02.

-pXXXX: الخيار -p مقصود فيه زي ما وضحت فوق password، وXXXX هي الباسوورد، وتأكد مره ثانية ما تكتب أي مسافة بين -p و وباسووردك.

أوكي، الحين بيدخلك إلى الشل الخاص بقاعدة البيانات، وزي ما إنت شايف تغير شكل الشل وطلع لك:

mysql>

أوكي، نكتب أمر إنشاء قاعدة بيانات جديدة اسمها wordpress2

create database wordpress2;

وبيطلع لنا نتيجة تنفيذ الأمر:

Query OK, 1 row affected (0.00 sec)

الحين ننشيء يوزر خاص بقاعدة هالبيانات -راح نسميه wpuser- عشان هو الوحيد اللي يكون معه كنترول على هالقاعدة:

grant all privileges on wordpress2.* to wpuser@'localhost' identified by 'XXXX'; flush privileges;

وغير XXXX إلى الباسوورد اللي تبغى إنت.

حلو، الحين أطلع من الشل حقت قاعدة البيانات، عن طريق الأمر

exit

لجل يرجعك إلى الشل الخاصة بالسيرفر.

حلوين، الحين أنشئنا قاعدة بيانات مع يوزر خاص فيها، خلونا نزرع محتويات قاعدة البيانات القديمة إلى الجديدة، عن طريق الأمر:

mysql -u wpuser -pXXXX wordpress2 < /home/user02/wordpress1.sql

وإذا كنت ظاغط الملف قبل ترسله للسيرفر الثاني، فك الضغط عنه أول عن طريق:

gunzip -d wordpress1.sql.gz

ثم طبق الأمر اللي فوق حق الإسترجاع والزرع.

وتم الأسترجاع والزرع، الحين روح وعدل ملف إعدادت قاعدة البيانات الخاص ببرنامج موقعك إلى المعلومات الجديدة، ومبروك عليك الموقع الجديد!

4: ملاحظات مهمة:

1- الأسماء اللي أستخدمتها بالشرح فوق زي user01, user02, server02, server01 وغيرهم، هذولي من رأسي، يعني ما راح يكونون بالسيرفر حقك، هذي الأسماء تجيك إنت لما تستأجر إستضافة من الشركة اللي مستضيف عندها.

2- تقدر تسوي أغلب الكلام اللي فوق والأوامر عن طريق cPanel أو لوحة تحكم موقعك، زي زرع قاعدة البيانات، إنشاء واحدة، بس معليش، ما أعرف أستخدمهم، أو بشكل أصح ما أحب، وكذا أسرع :-).

3- الشرح اللي فوق يحتوي على الأوامر الأساسية لكل شيء، يعني ما تطرقنا لحماية مثلاً اسم المستخدم حق قاعدة البيانات لجل ما حد يسرقها و يتخطى صلاحيته وغيرها.

4- بعد ما يكتمل الشغل اللي فوق، أحذف الملفات الإحتياطية اللي موجودة تحت public_html على كل السيرفرين عن طريق الأمر

rm /home/user02/public_html/wp-backup.tar.gz

5- الشرح مو مخصص فقط للمدونات، الشرح مخصص لأي موقع ويب، منتدى أو موقع شخصي أو غيرهم.

6- أغلب السيرفرات مجلد الويب يكون زي ما ذكرت فوق موجود تحت مجلد اليوزر بالأسم public_html، سيرفرات ثانية راح يكون مجلد الويب تحت هالمجلد

/var/www/html

هذا في لينكس، اما في يونكس FreeBSD، فيكون تحت

/usr/local/www/data

والسبب إنو يكون مفعل على السيرفر تقنية تسمى Virtual Hosting، يعني تضيف أكثر من موقع على نفس السيرفر وكل واحد له دومين خاص فيه منفصلين عن بعضهم.

7- أخيراً، أحب أوضح إنو ما فيه شيء أسمه أوامر SSH، SSH هو برتوكول، وكل الأومر هي الأوامر اللي تتنفذ هي أوامر موجودة في النظام نفسه مو في SSH.

روابط تفيدك بنفس الموضوع:

تسريع الإتصال بالسيرفر عن طريق SSH

شرح تأمين وحماية SSH في لينكس ويونكس ، الجزء الأول

لتفادي إختراق موقعك، توقف عن إستخدام FTP

شرح طريقة أخذ نسخة إحتياطية من قاعدة بيانات المدونة تلقائياً كل فترة تبيها