في الشبكات وبالذات في تخصص إدارة السيرفرات، المحفاظة على إتصال السيرفر من الإنقطاع هذي شيء أساسي ومهم قبل أي حاجة، لأن لو إنقطع الإتصال بالسيرفر وخلاص صرت ما تقدر تتصل فيه، أيش الفائدة من السيرفر؟!
بشكل أبسط، نفترض إني صاحب بنك، وفي بنكي انا مقدم خدماتي عن طريق الإنترنت ﻷجل أسهل على العملاء إنهم يخلصون معاملاتهم البنكية من تحويل وإدراة أرصدة بدون حضورهم شخصياً للبنك.
طبعاً عشان أقدم خدماتي عن طريق الإنترنت، لازم يكون عندي سيرفر مستضيف موقعي، وموقعي فيه كل هالتعاملات البنكية اللي يحتاجها العميل. طيب إذا هالسيرفر فقد الإتصال بالإنترنت، أيش الفائدة منه؟
العملاء الخاصين ببنكي ما راح يدخلون الموقع، وهالشيء راح ينعكس على سمعتي، إن بنك جريس سيء في خدماته الإنترنتية، وكل شوي متعطل موقعهم. بكذا خسرت شريحة كبيرة من عملائي المهتمين بالتعامل عن طريق الويب للتعاملات البنكية.
أمم الأغلبية المتابعين للمدونة لاحظوا قلة طرحي للمواضيع من فترة مو قصيرة، وبرضوا تأخري بالرد على الإيميلات.
تشرفت بمقابلة أحد الشباب المتابعين للمدونة، الأخ وليد القويفلي البارحة في جمعة رياض قييكس، وقالي إني مقل بتدوينات، مو مثل قبل!.
هو صادق، أتذكر بأحد التدوينات إني قلت: “راح أكتب تدوينة إلى تدوينتين أسبوعياً”، والحين صار يالله تدوينة واحدة شهرياً!.
أعرف إني مقل بالتدوين، ومضايقني هالشيء، لكن مو تقصير مني وعدم اهتمام، لكن تغيرت علي أشياء بالشهور الماضية، وتلخبط جدولي الخاص بعد الدوام، وبالتأكيد لما يتلخبط جدولك نظام حياتك ينقلب فوق تحت.
فيه أشياء وتغييرات كبيرة مخطط أسويها بالمدونة، أخليها تفاعلية أكثر، وأعدل بعض الأخطاء اللي موجودة حالياً، وبعض الصفحات وغيرهم، لكن:(!
أبحاول إني أنظم وقت التدوين والردود على الإيميلات، ما زال عندي الكثير، وأتمنى يشوف النور.
المتابعين لأخبار لينكس وتوزيعاته أكيد قراء وعرف عن إصدار لينكس فيدورا النسخة 11 الأسبوع الماضي بتاريخ 09-06-2009، وبرضوا المتابع للمدونة أكيد لاحظ البانر الإعلاني الخاص فيها بالجانب الأيمن.
عموماً، راح أتكلم في هالتدوينة عن كيفية التحديث من النسخ الأقدم زي نسخة 9 أو 10، بدون ما تخسر أي شيء من ملفاتك، إن شاء الله.
التحديث له كذا طريقة، وحكيت عنها بوقت سابق لما صدرت فيدورا10، ونفس فكرة وطريقة التحديث تنطبق عليها.
عندك طريقتين مضمونات، إن شاءالله.
طرحت جامعة الملك عبدالله للعلوم والتقنية أعلان عن وظيفتين شاغرتين الأولى كمحلل والثانية أخصائي أنظمة يونكس سولاريس الإصدار 10.
وظيفة الشخص راح يكون Tier-2 Support أو 2nd Level support، أو بالعربي المستوى الثاني من الدعم.
وأغلب موظفي الشركات يعرفون وصف الدعم هذا، اللي هو يكون مطلوب منك تحل مشكلة ما قدر عليها فريق الدعم الفني Tier-1 suuport, 1st level support ، وإذا ما قدرت تحلها تصعدها للأعلى منك Tire-3 support, 3rd level support اللي هو مسؤولك الأعلى منك – المعلم Guru- :-).
مطلوب منك أشياء إعتيادية، تركيب سيرفر، نسخ إحتياطية، حماية، إدارة وغيرها، مع تركيزهم على التعامل مع أنظمة وسيرفرات سولاريس، والخبرة ما تقل عن سنة ولا تزيد عن خمس سنوات لوظيفة محلل الأنظمة، وأكثر من ست سنوات لوظيفة أخصائي نظم.
كان معي لقاء على قناة المجد في برنامج حياة تك بخصوص المصادر المفتوحة ولينكس.
اللقاء كان عبارة عن “دردشة”، فقط معلومات خفيفة وسريعة عن المصادر المفتوحة ولينكس بدون تعمق بالتفاصيل أو تشعب بالخصائص وغيرها.
بالمناسبة، لاحد يدقق بضياع ترابط الأفكار عندي، الكاميرا ورهبتها لها دور :-).
أستمتعوا! :-).
حفظاً للحقوق، الفيديو من تسجيل الأخ أبو مجاهد، جزاه الله كل خير.
كل الشكر للقائمين على البرنامج المميز.
أعلن الفريق الأمني لنظام FreeBSD وجود 3 ثغرات أمنية في النظام، والثغرات فيها السيء والأسوأ -وزي ما نقول حنا يالسعوديين الشين والأشين :-)-.
الإعلان كان يوم الإربعاء الفائت، 10-06-09، وتقريباً جميع إصدارات FreeBSD مصابة بالثغرات هذي، حتى الإصدار الأخير 7.2.
وهذي تفاصيلها:
1- ثغرة في سيرفر NTP :
تعريف بسيط لـ NTP:
سيرفر NTP هو اختصار لعبارة Network Time Protocol، وبالعربي أيش معناه؟
Network Time Protocol هو برتوكول مزامنة وقت وتاريخ جهازك الكمبيوتري مع سيرفر يقدم هالخدمة بشكل مظبوط.
وبمفهوم أوسع، بروتوكول NTP يسمح لك إنك تضمن إن وقت جهازك وتاريخه مظبوطات بشكل صحيح حسب توقيت دولتك، وحسب توقيت الأقمار الصناعية.
