بسم الله الرحمن الرحيم ،،

السلام عليكم ، وصباح الخير للجميع ..

تحديث: تم تحديث الروابط لأحدث نسخة من أبونتو، أوبنتو 8.10.

تكمله السلسة : سلسة تعلم لينكس ، الموضوع الثاني

اليوم السبت 18 أكتوبر 2008 ، وبيكون إن شاء الله هو اليوم الأول لسلسلة تعلم لينكس اللي راح تنطلق من هالمدونة ..

طرحت من قبل في أحد مواضيعي إنو راح يكون فيه سلسلة تعلم لينكس بعد العيد إن شاءالله ، صح إنو العيد منتهي من 18 يوم تقريباً ، لكن حبيت اتأخر شوي عشان تكون عندي تصور كامل لأيش الأشياء اللي راح أشرحها وتطرقي للمواضيع كيف بيكون ..

طبعاً زي ما ذكرت في الرابط السابق في الأعلى إنو راح يكون فيه برضوا شروحات فيديو  ( مع قناة التقنية العربية ) ، إن شاء الله راح تكون موجودة ، لكن راح تتأخر ، تعرفون إنتم كيف زحمة الفيديو والتسجيل والمونتاج :-) ..

إذاَ ، اليوم بنبتدي على بركة الله ، وهالموضوع راح يكون مقدمة مو تطبيق ..

أتكلم هنا عن أيش ؟

فقط بيكون كلام خفيف أيش تحتاج عشان نبدأ التثبيت ونبدأ التعلم ، تقدر تسميه مدخل إلى تعلم اللينكس :-)

ليه تبغى تتعلم لينكس ؟

يمكن ما تعرف الأجابة الحين إنت ، لكن راجع صفحة ماهو لينكس ؟ وإقراء عن لينكس عشان تعرف ليه إنت تبغى تتعلم لينكس ..

فيه نقطة أبغى أثيرها قبل ما نبدأ نتعلم لينكس ، تعلم لينكس والبدء فيه أسهل من السهل ، أسهل من شرب كأس ماء على الصباح ، تعلم لينكس سهل ، لكن هل إنت مستعد إنك تتعلم لينكس ؟

عشان تكون في الصورة ، فكرة لينكس ، هي بالظبط نفس فكرة ويندوز مايكروسوفت ، هي بالظبط نفس فكرة آبل ماك .. جميعهم أنظمة تشغيل ..

جميعهم عن طريقهم تقدر تتصفح النت ، تتسمع للملفات الصوتية ، تشغل أفلام ومقاطع مرئية ، تحرر ملفات نصية ، تحرر صور .. كلهم زي بعضهم ..

وكل واحد فيه مميزات تميزه ، مثلاً ويندوز منتشر بكل مكان ، ولا تعتقد إنو سبب إنتشار ويندوز هو إنو أحسن نظام تشغيل ، لا :-)

الإنتشار والكثرة مو دليل الأفضلية ، وأكبر مثال نانسي عجرم وهيفاء وهبي واليسا مافيه ولا عربي ما قد سمع فيهم أو سمع إسمهن ، مع إنهن سخيفات وشغلهن كله الله يخلف تعري :-)

هذا إثبات إنو مو الشيء لإنتشر معناه هو الزين ، هو الأفضل ، مطاعم ماكدونالدز بكل مكان ، هل معناها إنها هي أفضل مطاعم ؟

شركة الإتصالات السعودية هي الأكثر إنتشار في السعودية ، هل معناه إنها هي الأفضل ؟ << ما يدق أبد :-)

في لينكس ، كل شيء تبغاه وتريده موجود ، لكن بطريقة تختلف عن ويندوز..

مثال ، في ويندوز قائمة ابدأ Start موجودة تحت ، في لينكس إفتراضياً تجيك فوق ، مع العلم إنك تقدر تضعها تحت ..

هذي هي فكرة لينكس ، كل شيء موجود ، لكن بشكل يختلف عما كنت متعود عليه في ويندوز ..

فقط ، إنت اللي أبغاه منك أيش ؟

إنك تتقبل التغيير هذا ، تتقبل إنو إنت منتقل إلى نظام تشغيل جديد ، وكل شيء للمره الأولى بتلاقيه جديد عليك ، لكن تعود عليه فترة معينة وبتشكرني :-)

وبشكل أصح ، إعتبر لينكس برنامج جديد وجالس تتعلم عليه ، هل مثلاً لما بدأت تتعلم الفوتوشوب فهتمه كله بنظره عين ؟

ولا جلست وتعلمت عليه فترة ، ثم عرفت الاساسيات وبعدها تطورت للأفضل ؟

إعتبرها كذا ، وبس ..

حلوين ، أيش المتطلبات اللي نحتاجها عشان نثبت لينكس ؟

أي كمبيوتر موجود عندك ، حتى لو هو من قرن الديناصورات ، أهم شيء الرام أو الذاكرة ما تقل عن 256 ، والمساحة الفارغة بالهارديسك ما تقل عن 10 قيقا ..

وعلى فكرة ، وعشان تعرفوا أيش سهولة لينكس ، راح نثبت لينكس من داخل ويندوز ، يعني راح نقول لويندوز ” ويندوز إحنا راح نثبت لينكس كا برنامج ” ومعناها إنو إذا مليت من لينكس إنت لاسمح الله ، تقدر تحذفه من إضافة وإزالة برامج :-)

أسهل من كذا أيش تبغى ؟!

الخطوة الأخيرة ، تحميل لينكس من الإنترنت والإستعداد للموضوع اللي بعد هذا ، اللي هو موضوع تثبيت لينكس ..

أبغى منك تحمل ملفين ، الأول حجمه مايتعدى 1 ميقا ، وهو اللي بيساعدنا نثبت لينكس من داخل ويندوز ، من الرابط هذا

والثاني ، نسخة نظام لينكس أوبنتو Ubuntu الإصدار 8.10 ، من أحد الروابط في الأسفل :

للمعلومية وقبل بدء التحميل ، حجم الملف 700 ميقا ، يفضل إستخدام برنامج إستكمال التحميل في ويندوز مثل برنامج أوربيت ، على الرابط هذا ..

أو إستخدم متصفح فايرفوكس إذا كنت للحين تتسخدم اللي “يقال إنو متصفح” إنترنت إكسبلورر :-)

روابط التحميل ، إختر أحد أسرع الروابط من الأسفل

الرابط هذا

وإذا كانوا جميعهم بطيئات ، ياليت تخبرني برد ..

ولمستخدمي التورينت ، حمل ملف التورينت هذا

اما إذا كنت في الرياض ، ولاعندك خط إنترنت سريع ، أقدر أوفر لك السي دي ، إدخل على صفحة معلوماتي و أرسلي إيميل أو كلمني ..

الموضوع بين يدينكم ، اللي يبغى يستفسر أو يسأل ، الله يحيه ، يتفضل يكتب اللي يبغى بالردود

طلب آخير ، أتمنى نشر الموضوع لأكبر مجموعة لتعم الفائدة ، إنشر الموضوع لأصحابك لجل الناس تستفيد ، إنشر العلم ..

إنسخ الرابط في الأسفل و أنشره

http://jerais.com/plug/?p=344

تحديث : أضفت الموضوع على Digg

الله يسهل علينا ، وإن شاء الله إن الجميع بيستفيد ..

كل التوفيق ، جريس ..